ᖁᑦᑎᑦᑐᒥ ᐅᑭᐅᑕᖅᑐᒥ ᓴᓗᒻᒪᓴᕐᓂᖅ ᓇᓂᓯᔪᑦ ᕿᒪᐃᓐᓇᖅᑕᐅᓯᒪᔪᓂᑦ ᓄᓗᐊᓂᑦ, ᐃᒥᒐᑎᒥᓂᑐᖃᕐᒥᑦ
(For the English version, please click here.)
ᓄᓐᖓᕈᑦ ᐱᒻᒪᕆᐅᓛᖑᔪᖅ ᐃᓄᓐᓄᑦ ᓂᒋᖓᓂ ᕿᑭᖅᑖᓗᒃ. ᐊᑐᖅᑕᐅᕙᑦᑐᖅ ᐊᖑᓇᓱᕝᕕᐅᓪᓗᓂ ᐊᒻᒪ ᐃᖃᓗᒐᓱᐊᕐᕕᐅᓪᓗᓂ, ᐱᓗᐊᖅᑐᒥᑦ ᐃᖃᓗᓐᓄᑦ, ᐊᒻᒪ ᑭᓪᓕᖓᓃᑦᑐᖅ ᓄᓇᖅᐸᒧ ᐊᖅᑯᑎᖓᒍ ᐃᖃᓗᓐᓂ ᑭᒻᒥᕈᒻᒧᑦ. ᐊᒥᓱᑦ ᐃᓕᓐᓂᐊᕐᕖᑦ ᐊᒻᒪ ᒐᕙᒪᒃᑯᓐᓄᑦ ᐱᓕᕆᕖᑦ ᐊᑐᖃᑦᑕᖅᑕᖓ ᓄᓇᒦᓐᓂᕐᒧᑦ ᐃᓕᓐᓂᐊᓂᕐᒧᑦ ᐊᒻᒪ ᐃᓄᐃᑦ ᖃᐅᔨᒪᔭᑐᖃᖏᓐᓄᑦ ᐅᓪᓗᖏᓐᓄᑦ −− ᑐᕌᖓᑎᑕᐅᔪᑦ ᐃᓕᓐᓂᐊᓂᕐᒧᑦ ᐃᓄᐃᑦ ᐱᖅᖁᓯᖏᓐᓂ, ᐅᕝᕙᓘᓐᓃᑦ ᐃᓄᐃᑦ ᖃᐅᔨᒪᔭᑐᖃᖏᑦ.
ᑲᑎᖃᑎᒋᒐᒃᑭᑦ ᐊᒪᕈᖅ ᐆᒪᔪᕐᓂᐊᑎᒃᑯᑦ ᑲᑐᔾᔨᖃᑎᒌᖏᑦ ᐃᖃᓗᓐᓂ ᐅᖃᐅᓯᕆᓪᓗᒍ ᐱᓕᕆᖃᑎᒌᓐᓂᕐᒥᑦ ᓴᓗᒻᒪᖅᓴᐃᓂᕐᒧᑦ ᐱᓕᕆᐊᒥᑦ ᖃᓂᒋᔭᖓᓄ ᕿᒥᑦᑎᐊᕙᓐᓄ ᐃᒪᖃᕐᕕᐅᔪᒥᑦ, ᓇᓗᓇᐃᖅᓯᑦᑕᐅᑎᒋᓚᐅᖅᑐᑦ ᓄᓐᖓᕈᒥᑦ ᓯᕗᓪᓕᐸᐅᔾᔭᐅᓪᓗᓂ.
ᐊᑕᓯᓪᓗᐊᑕᒥᑦ ᕿᓂᕐᓂᖃᓚᐅᖅᑐᒍᑦ ᓴᓗᒻᒪᓴᖅᑐᒍ ᓄᓗᐊᑦ ᕿᒪᐃᓐᓇᖅᑕᐅᓯᒪᔪᑦ ᑕᓯᕐᒥᑦ ᐅᕝᕙᓘᓐᓃᑦ ᑰᖓᓂ, ᐊᑦᑐᓈᑦ ᐊᒻᒪ ᓄᓗᐊᑦ ᓂᒐᕕᒍᓐᓇᖅᑐᑦ ᑐᑦᑐᐃᑦ ᓇᔾᔪᖏᓐᓄᑦ, ᐊᒻᒪ ᓄᓗᐊᑦ ᐃᖃᓗᓐᓂᑦ ᓄᓗᐊᖅᑎᑏᓐᓇᖃᑦᑕᕈᓐᓇᖅᑐᑦ ᕿᒪᑦᑕᐅᓯᒪᒍᑎ. ᓴᓗᒻᒪᖅᓴᐃᓂᖃᕈᒪᓚᐅᕐᒥᔪᒍᑦ ᐊᓯᐊᓂ ᐊᑦᑕᑯᓂᑦ ᐱᔾᔪᑎᒋᓪᓗᒍ ᐆᒪᔪᐃᑦ ᓂᕆᖃᑦᑕᕈᓐᓇᕐᖓᑕ ᓂᕆᒋᐊᖏᑕᖏᓐᓂ ᐊᐅᑦᑕᔫᓂᑦ (ᐅᕝᕙᓘᓐᓃᑦ ᒥᑭᔫᑎᕋᒫᑦ ᐊᐅᑦᑕᔫᑦ).
ᓴᓗᒻᒪᓴᕐᓂᐅᔪᖅ ᐃᑦᑕᕐᓂᓴᓕᕆᔨᐅᔮᖅᑐᖅ −− ᓇᓂᓯᓚᐅᖅᑐᒍᑦ 7-Up ᓇᓗᓇᐃᒃᑯᑕᓕᒻᒥ ᐃᒥᒐᐅᑎᒥᓂᕐᒥᑦ 1960−ᖏᓐᓃᖔᖅᑐᑦ! — ᑕᑯᒍᓐᓇᖅᑕᐃᑦ ᐊᑦᑐᖅᑕᐅᖃᑦᑕᖅᓯᒪᓂᖓ ᓄᓇ.
ᑲᑐᑎᓪᓗᑕ, ᐋᖅᑭᔅᓯᓚᐅᖅᑐᒍᑦ ᐱᓕᕆᔨᓂᑦ ᖃᐅᔨᓴᕐᓗᒋᑦ ᐊᒻᒪ ᓴᓗᒻᒪᓴᕐᓗᓂ. ᒪᕐᕉᓐᓂᒃ ᐅᒥᐊᖃᕆᐊᖃᓚᐅᖅᑐᒍᑦ ᑕᐃᑯᖓᕋᓱᐊᖅᑐᑕ, ᐊᑕᐅᓯᖅ ᐅᓯᔪᖅ ᐱᓲᑎᓂᑦ, ᑭᓯᐊᓂ ᕿᓚᒥᐅᔪᒥᑦ ᐱᕕᔅᓴᖃᓚᐅᖅᑐᒍᑦ ᐅᓕᓐᖓᑎᓪᓗᒍ ᐃᓯᕈᓐᓇᓂᑦᑎᓐᓄᑦ ᐊᒻᒪ ᐊᓂᒍᓐᓇᓂᑦᑎᓐᓄ.
ᓴᓗᒻᒪᕐᓂᕗᑦ ᐱᓕᕆᐊᓪᓗᐊᑕᖃᓚᐅᖅᑐᑦ ᒪᕐᕉᓐᓂᒃ ᓇᒦ−ᕕᒋᔭᖏᓐ: ᑕᓯᖅ ᐅᐊᓐᓇᖓᓂ ᒪᕐᕉᓐᓂᒃ ᑰᓐᓂᒃ ᐊᒻᒪ ᐃᓚᖓ ᓂᒋᖓᓂ ᑰᖓᓂ ᐃᖃᓗᒐᓱᐊᕐᕕᐅᕙᑦᑐᖅ ᐃᓚᒌᓄᑦ.
ᑕᓯᕐᒥᑦ
ᐅᕙᓂ, ᓇᓂᓯᓚᐅᖅᑐᒍᑦ ᑎᓴᒪᓂᑦ ᓄᓗᐊᓂᑦ ᐃᒪᐅᖓᑕ ᑭᓪᓕᖓᓂ, ᑭᓯᐊᓂ ᓇᓂᓯᓚᐅᖏᑦᑐᒍᑦ ᑕᓯᕐᒥ. ᐊᓯᖏᑦ ᐊᔾᔨᒌᖏᑦᑑᑎᑦ ᐊᑦᑕᑯᐃᑦ ᓄᐊᑕᐅᓚᐅᖅᑐᑦ; ᑑᕐᓂᑦ ᐊᒻᒪ ᕿᔪᓐᓂᑦ ᓄᓗᔾᔨᕈᑎᐅᔪᓂᑦ ᓯᑰᑉ ᐊᑖᒍᑦ; ᐊᒻᒪ ᓇᑎᔅᓴᐃᑦ ᐊᒻᒪ ᕿᐲᑦ, ᐃᒻᒪᖃ ᖃᒧᑎᓐᓃᖔᖅᓯᒪᔪᑦ.
ᑰᖓᓂ
ᐱᓚᐅᖅᑐᒍᑦ 18 ᓄᓗᐊᓂᑦ ᑕᕝᕙᓂ, ᐃᒪᕐᒥᐅᑕᓂᑦ ᐱᕈᖅᑐᓕ ᐊᑕᐅᓯᖅ ᑰᖓᓂ ᐃᓚᖏᑦ ᓇᓂᔭᐅᓪᓗᑎ ᓄᓇᒥᑦ. ᐃᓱᒪᒋᔭᕗᑦ ᐱᔾᔪᑎᒋᓪᓗᒍ ᐅᑭᐊᔅᓵᖑᑎᓪᓗᒍ ᑕᐃᑯᓐᖓᓚᐅᕋᑦᑕ −− ᐃᒪᖓ ᐊᑦᑎᓂᖅᓴᐅᑎᓪᓗᒍᒍ ᓴᓂᐊᓂ ᐅᐱᕐᖔᒃᑯᑦ — ᐊᒻᒪ ᓯᑯᖓ ᐊᒻᒪ ᐅᐱᕐᖔᒃᑯᑦ ᑰᓕᕐᓂᖓ ᓄᓇᒨᖅᓯᓯᒪᔪᑦ. ᐊᓯᖏᓐᓂᑦ ᐊᑦᑕᑯᑕᖃᓚᐅᖅᑐᑦ ᑕᒫᓂ −− ᖃᒧᑕᐅᔭᒥᓂᒐᓛᑦ, ᓱᕋᔅᓯᒪᔪᑦ ᐳᓪᓚᒨᖅᑐᑦ ᐅᒥᐊᑦ, ᓴᕕᕋᔭᐃᑦ ᐊᒻᒪ ᐊᑦᑐᓈᑦ −− ᐱᑕᖃᖏᓂᖅᓴᐅᔪᖅ ᑕᓯᐅᑉ ᓴᓂᐊᓂ.
ᐃᓕᓚᐅᖅᑕᕗᑦ
ᓇᓗᓇᐃᖅᑕᐅᓯᒪᔪᖅ ᐊᒪᕈᖅ ᐆᒪᔪᕐᓂᐊᑎᒃᑯᑦ ᑲᑐᔾᔨᖃᑎᒌᖏᓐᓄᑦ, ᓴᓗᒻᒪᖅᓴᐃᔩᑦ, ᐊᒻᒪ ᐊᓯᖏᑦ ᐃᖃᓗᒻᒥᐅᑦ ᐊᖏᓂᖏᑦ ᐃᖃᓗᐃᑦ ᐃᖃᓗᑦᑕᐅᕙᑦᑐᑦ ᓄᓐᖓᕈᒻᒥ ᒥᑭᓪᓕᕙᓪᓕᐊᓕᖅᑐᑦ ᐊᕐᕌᒍᓂ ᐊᕙᑎᐅᓕᖅᑐᓂᑦ. ᕿᓂᕐᓂᖃᖅᑎᓪᓗᑕ ᓄᓗᐊᑐᖃᕐᓂᑦ, ᐊᓯᖏᑦ ᐱᔾᔪᑕᐅᔪᓐᓇᖅᑐᑦ ᐊᑦᑎᓪᓕᒋᐊᕐᓂᖏᓐᓄᑦ ᐃᖃᓗᐃᑦ ᐱᐅᓂᖏᓐᓄᑦ −− ᓱᕋᓐᓇᖅᑐᑦ ᓴᕕᕋᔭᓐᓃᖔᖅᑐᑦ ᐊᒻᒪ ᒐᓯᖃᐅᑎᓂᑦ ᐊᒻᒪᓗᑦᑕᐅᖅ ᐃᖃᓗᕝᕕᐅᓗᐊᖃᑦᑕᕐᓂᖓᓄᑦ ᖃᓂᒋᓂᖓᓄᑦ ᐃᖃᓗᐃᑦ.
ᑐᓂᓚᐅᖅᑕᕗᑦ ᑐᑭᓯᒋᐊᕈᑏᑦ ᐊᒪᕈᖅ ᐆᒪᔪᕐᓂᐊᑎᒃᑯᑦ ᑲᑐᔾᔨᖃᑎᒌᖏᓐᓄᑦ ᐊᒻᒪ ᐃᒪᕐᒥᐅᑕᓕᕆᔨᒃᑯᑦ ᑲᓇᑕᒥ, ᐊᒻᒪ ᐊᓯᖏᑦ ᐃᓄᐃᑦ ᐱᔪᒪᓂᖃᖅᑐᑦ ᓄᓐᖓᕈᒻᒥᑦ ᖃᓄᐃᖏᑎᐊᖅᑎᑦᑎᓗᑎ, ᐊᒻᒪ ᒫᓐᓇ ᐃᓱᒪᖅᓴᖅᓯᐅᕈᓘᔭᓕᕐᖓᑕ ᐃᓕᓐᓂᐊᓂᕐᒥᑦ ᐊᒻᒪ ᖃᐅᔨᒪᓇᓱᑦᑐᒋᑦ ᐱᓕᕆᐊᖑᒋᐊᓖᑦ ᑖᒃᑯᐊ ᓄᓗᐊᑦ ᕿᒪᐃᓐᓇᖅᑕᐅᖃᑦᑕᖏᓪᓗᑎ.
ᓴᓗᒻᒪᖅᓴᐃᖃᑕᐅᓂᕐᒥᑦ ᐊᕝᕙᓂ ᐊᔾᔨᐅᓚᐅᖏᑦᑐᖅ ᐊᑐᕐᓂᕆᔭᕋ. ᓄᓇᖓᕈᑦ ᓄᓇᖓ ᐱᐅᔪᖅ ᐊᒻᒪ ᐱᖅᑯᓯᓄᑦ ᐱᒻᒪᕆᐅᓪᓗᓂ, ᐊᒻᒪ ᐊᖏᕋᕆᔭᐅᔪᖅ ᐊᒥᓱᓄᑦ ᐆᒪᔪᓄᑦ. ᑕᑯᓚᐅᖅᑐᒍᑦ ᐅᑉᐱᔾᔪᐊᒥᑦ ᐊᒻᒪ ᐊᒥᓱᓂᑦ ᑎᑳᒍᓪᓕᓂᑦ ᐊᒻᒪ ᑲᖑᕐᓂᑦ. ᐸᐅᕐᖓᖃᕐᓇᐅᓚᐅᕐᒥᔪᖅ.
ᖁᕕᐊᒋᔭᖃᑦᑎᐊᖅᑐᖓ ᓄᓇᒦᒍᓐᓇᓂᕐᓄᑦ ᓴᓗᒻᒪᖅᓴᐃᖃᑕᐅᔪᓂᑦ ᐃᓄᓐᓂᑦ ᑐᓂᓯᓪᓗᑎ ᐱᕕᔅᓴᒥᓂ, ᖃᐅᔨᒪᔭᖏᓐᓂ ᐊᒻᒪ ᐃᑲᔪᓂᕐᒧᑦ ᑕᕝᕙᓂ ᐱᓕᕆᐊᒥ.
ᖁᔭᓐᓇᒦᓗᐊᖅᑐᒍ ᑕᐃᓴᓐ ᑲᓪᓗᒃ, ᐃᓚᒋᔭᖓ ᐅᒥᐊᕐᒥ ᐊᐅᓚᑦᑎᔨᐅᖃᑕᐅᔪᑦ ᐊᒻᒪ ᓯᕗᓕᖅᑎᓪᓚᕆᒃ ᓴᓗᒻᒪᖅᓴᐃᔨᓄᑦ ᐃᑲᕗᓚᐅᖅᑐᑦ ᑕᒪᑐᒥᖓ ᑲᔪᓯᑦᑎᐊᕐᓂᖓᓄᑦ, ᐊᒻᒪ ᑕᐃᕕᑎ ᖁᓪᓗᐊᓕᑦ, ᓴᐃ ᖃᕙᕙᐅᖅ, ᐊᒻᒪ ᑕᐃᕕᑎ ᐊᒪᕈᐊᓕᒃ ᐃᑲᔪᕐᔪᐊᓚᐅᖅᑐᑦ ᐊᖁᑦᑐᑎ ᐱᓲᑎᓂᑦ, ᓴᒻᒪᖅᓴᐃᓪᓗᑎ ᐊᑦᑕᑯᓂᑦ, ᕿᓂᖅᑐᑎ ᓄᓗᐊᓂᑦ ᑕᓯᕐᒥᑦ, ᐊᒻᒪ ᐅᕙᑦᑎᓐᓂ ᐊᑦᑕᓇᐃᖅᓯᒪᑎᑦᑎᓂᖏᓐᓄᑦ ᓄᓇᒦᑦᑎᓪᓗᑕ. ᖁᔭᓐᓇᒦᕐᒥᔭᕋᑦᑕᐅᖅ ᐋᓕᒃ ᕕᓕᐅᕆᑎ ᐊᐃᑉᐸᖓᓄ ᐅᒥᐊᒧ, ᐱᓲᑎᒧᑦ, ᐊᒻᒪ ᐃᖅᑲᓇᐃᔭᐅᑎᓄᑦ ᐃᑲᔪᓂᕐᒧᑦ, ᕕᐊᓐ ᖁᕕᒃ ᐊᑐᖅᑕᐅᓂᖓᓄ ᐱᓲᑎᖓ, ᐊᒻᒪ ᐊᒪᕈᖅ ᐆᒪᔪᕐᓂᐊᑎᒃᑯᑦ ᑲᑐᔾᔨᖃᑎᒌᖏᑦ ᐱᓕᕆᖃᑎᒋᔭᐅᓂᖏᓐᓄᑦ ᑕᕝᕙᓂ ᐱᓕᕆᐊᒥᑦ. ᖁᔭᓐᓇᒦᒃ!