ᓄᓇᕗᒻᒥᐅᑕᐃᑦ ᐃᑲᔪᖅᑕᐅᔭᕆᐊᓖᑦ ᓄᓇᒦᖔᖅᑐᓂᑦ
ᐊᐅᓪᓚᕐᓂᖃᖅᑎᓪᓗᑕ ᐅᕙᒍᑦ ᐅᑭᐅᑕᖅᑐᒥ ᐊᓪᓚᕕᖓᓂ ᐃᖃᓗᓐᓂ ᐱᖓᓐᓇᖓᓄ ᓄᓇᕗᑦ ᕼᐊᒻᒪᓚᖓᑦ ᑰᒑᕐᔪᒃ ᑕᒪᑐᒪᓂ ᐊᐅᔭᒥ, ᓄᖅᑲᓚᐅᖅᑐᒍᑦ ᐃᖃᓗᑦᑑᑦᑎᐊᒧᑦ ᖃᐅᔨᒋᐊᖅᑐᒍ ᑲᓇᑕᒥ ᐅᑭᐅᑕᖅᑐᒥ ᖁᑦᑎᑦᑐᒥ ᖃᐅᔨᓴᕐᕕᒃ (CHARS) ᐊᒻᒪ, ᐱᓗᐊᖅᑐᒥᑦ, ᓯᕿᓂᕐᒧᑦ ᐆᒻᒪᖅᑯᑎᓕᐅᕈᑏᑦ ᓴᓂᕌᓂ. ᑕᑯᒥᓇᖅᑐᖅ ᐃᓪᓗᖅ, ᐊᒻᒪ ᑐᑯᒥᓇᖅᑐᑎᑦ ᓯᕿᓂᕐᒧᑦ ᐆᒻᒪᖅᑯᑎᓕᐅᕈᑏᑦ, ᑭᓯᐊᓂ 10-kilowatt (kW) ᐋᖅᑭᑦᑕᐅᓯᒪᓂᖓ ᒫᓐᓇᐅᔪᒥᑦ ᓄᓇᒦᖔᖅᑐᓂᑦ ᐆᒻᒪᖅᑯᑎᓕᐅᖏᑦᑐᑦ ᓄᓇᓕᒻᒧᑦ.
ᑕᒪᓐᓇ ᖁᓅᒻᒥᓇᕋᓗᐊᖅᑎᓪᓗᒍ, ᓂᕆᐅᓇᖏᑦᑑᓚᐅᖏᑦᑐᖅ.
ᑰᒑᕐᔪᒻᒥ, ᐊᔾᔨᖓᓂ ᑕᑯᓚᐅᖅᑐᖓ ᐊᑲᐅᖏᓕᐅᕈᑎᐅᔪᒥ 12-kW ᓯᕿᓂᕐᒧᑦ ᐆᒻᒪᖅᑯᑎᓕᐅᕈᑏᑦ ᐋᖅᑭᑦᑕᐅᓯᒪᔪᑦ ᐊᓐᓂᑭᑦᑐᐊᔪᕐᕕᖓᓂ ᐃᑲᔪᖅᑐᓂ ᓄᓇᓕᒻᒧᑦ ᖁᐊᒃᕕᒧᑦ 2016−ᒥᑦ. ᓄᓇᓕᒻᒧᑦ ᖁᐊᒃᑯᕖᑦ ᐱᒻᒪᕆᐅᔪᑦ ᐱᖁᑎᕐᔪᐊᖑᓪᓗᑎ ᐊᖑᓇᓱᑦᑎᓄᑦ ᓂᕿᒃᑯᕕᐅᕙᑦᑐᓂ ᐃᓄᐃᑦ ᓂᕿᖏᓐᓂ ᐃᓗᐃᑦᑐᒡᒍᑕᓂ −− ᐊᒻᒪ ᓯᕿᓂᕐᒧᑦ ᐆᒻᒪᖅᑯᑎᓕᐅᕈᑦ ᓈᒻᒪᑎᐊᖅᑐᖅ ᐱᔾᔪᑎᒋᓪᓗᒍ ᓄᓇᓕᒻᒥ ᖁᐊᒃᑯᕖᑦ ᐱᔭᐅᔭᕆᐊᖃᕐᒪᑕ ᐊᐅᔭᐅᑎᓪᓗᒍ ᓯᕿᓐᓂᖃᑦᑕᓕᖅᑎᓪᓗᒍ ᐆᒻᒪᖅᑯᑎᖃᖅᑎᓪᓗᒍ ᖁᐊᒃᑯᕕᒃ.
ᐃᓱᒫᓘᑕᐅᔪᖅ ᐆᒻᒪᖅᑯᑎᓕᕆᔨᖏᑦ, ᖁᓪᓕᖅ ᐆᒻᒪᖅᑯᑎᓕᕆᔨᒃᑯᑦ ᑯᐊᐳᕇᓴᓐ (QEC), ᓱᓕ ᓴᖅᑭᑎᑦᑎᓯᒪᖏᑦᑐᑦ ᐃᒻᒥᒃᑯᑦ ᐆᒻᒪᖅᑯᑎᓕᐅᖅᑎᒧ ᐱᓕᕆᐊᒥ, ᐱᔪᓐᓇᑎᑦᑎᒐᔭᖅᑐᖅ ᐃᓄᓐᓂᑦ ᐆᒪᖅᑯᑎᓕᐅᕈᓴᑎᑦᑎᓗᑎ ᓯᕿᓂᕐᒧᑦ ᐆᒻᒪᖅᑯᑎᓕᐅᖅᑕᓂᑦ ᐊᓯᐊᓂ ᓄᓇᓕᒻᒥ ᐊᑐᖅᑕᐅᓗᓂ (ᓲᕐᓗ ᐊᐅᔭᒃᑯᑦ, ᐆᑦᑑᑎᒋᓗᒍ, ᐱᔭᕆᐊᖃᓗᐊᕈᓐᓃᑎᓪᓗᒋᑦ). ᑕᐃᒪᓕ ᑭᓯᐊᓂ, ᓄᓇᒦ ᖔᖅᑐᑦ ᐆᒻᒪᖅᑯᑎᑦ ᐋᖅᑭᑦᑕᐅᓂᖏᑦ ᖁᕝᕙᓯᓐᓂᖅᓴᐅᔪᑦ 10 kW ᐃᓚᒋᔭᐅᓕᕈᓐᓇᖏᑦᑐᑦ ᐆᒻᒪᖅᑯᑎᓄᑦ ᐊᒻᒪ ᑕᐃᒪᐃᓐᓂᖓᓄᑦ ᐊᑦᑎᓕᒋᐊᖅᑎᑦᑎᔪᓐᓇᖏᑦᑐᖅ ᓂᐅᕕᖃᑦᑕᖅᑐᓄᑦ ᐊᑭᖏᓐᓄᑦ ᐊᒻᒪ ᐳᔪᕐᓗᐃᑦ ᓯᓚᒨᖅᑲᖅᑐᑦ.
ᐃᖅᑲᓇᐃᔭᖃᑎᖃᖅᓯᒪᔪᖓ ᑰᒑᕐᔪᒃ ᕼᐊᒻᒪᓚᒃᑯᑦ ᓯᕗᓕᖅᑎᖏᓐᓂ, QEC, ᒪᕐᕉᒃ ᓯᕿᓂᕐᒧᑦ ᐆᒻᒪᖅᑯᑎᓕᐅᕈᑎᓄᑦ ᐋᖅᑭᑦᑕᐅᓂᖏᓐᓄᑦ ᐊᒻᒪ ᐅᐊᔭᓄᑦ ᖃᐅᔨᓴᖅᑏᑦ ᑎᑭᑕᐅᓗᑎ ᐋᖅᑭᒍᑎᖃᖅᑎᑦᑎᓗᑎ ᐊᓐᓂᑭᑦᑐᕐᕕᐅᑉ ᓯᕿᓂᕐᒧᑦ ᐆᒻᒪᖅᑯᑎᓕᐅᕈᑎᖓ ᐃᓚᒋᓕᖅᑎᑕᐅᓗᓂ ᐆᒻᒪᖅᑯᑎᓄᑦ. ᓄᓇᓕᐅᔪᖅ ᐊᑭᓖᓂᖃᓚᐅᖅᑐᑦ ᖃᓪᓗᓈᓃᖔᖅᑐᓂᑦ ᓯᕿᓂᕐᒧᑦ ᐆᒻᒪᖅᑯᑎᓕᐅᕈᑎᓄᑦ ᐋᖅᑭᔅᓯᔨᓂᑦ ᐋᒡᒌᓯᒥᑦ ᐋᖅᑭᑦᑕᐅᑎᑦᑐᒍ 10 kW ᐊᖏᓂᖓᓄᑦ.
ᓄᓇᓖᑦ ᐊᑐᐃᓐᓇᐅᓕᖅᑐᑦ ᓄᓇᒦᖔᖅᑐᓂᑦ ᐆᒻᒪᖅᑯᑎᓂᑦ — ᐊᑐᖏᓂᖅᓴᐅᔪᒪᔪᑦ ᐅᖅᓱᐊᓗᓐᓂᑦ, ᑮᓇᐅᔭᖅᑐᖏᓐᓂᖅᓴᐅᓗᑎ ᐆᒻᒪᖅᑯᑎᓄᑦ ᐊᒻᒪ ᓴᐳᒻᒥᓗᒍ ᐊᕙᑎ. ᑭᓯᐊᓂ ᐃᓚᖓ ᐊᕝᕕᕋᕈᑎᓪᓗᐊᑕᕆᔭᖓ ᒫᓐᓇ ᐊᑐᐊᒐᖅᑕᖃᑦᑎᐊᖏᓐᓂᖏᓐᓄᑦ ᐃᑲᔪᖅᑐᓂᑦ ᓄᓇᒦᖔᖅᑐᓂᑦ ᐆᒻᒪᖅᑯᑎᓂᑦ.
QEC−ᑯᑦ ᓱᒃᑲᐃᓐᓂᖃᕋᓗᐊᖅᑎᓪᓗᒋᑦ, ᑕᐃᑯᖓᑦᑎᐊᖅ ᑐᕌᕐᓂᖃᖅᑐᑦ. ᐃᑲᔪᕐᓗᑎ, ᓄᓇᕗᑦ ᒐᕙᒪᒃᑯᑦ ᓯᕗᓕᖅᑎᐅᔪᓐᓇᖅᑐᑦ ᐋᖅᑭᔅᓯᓗᑎ ᓄᓇᕗᓕᒫᒧᑦ ᓴᓗᒪᔪᓂᑦ ᐆᒻᒪᖅᑯᑎᓂ ᑐᕌᖅᑕᐅᔪᓂᑦ ᐊᒻᒪ ᐳᔪᕐᓗᓂ ᓯᓚᒨᖅᑲᖅᑐᓂᑦ ᐊᑦᑎᓪᓕᒋᐊᖅᑕᐅᓂᖏᓐᓄᑦ ᑐᕌᖅᑕᐅᔪᑦ.
ᑰᒑᕐᔪᒃ ᓄᓇᓕᒻᒧᑦ ᐆᒻᒪᖅᑯᑎᓄᑦ ᐊᑐᑦᑎᐊᓛᖑᔪᑦ
ᑰᒑᕐᔪᒻᒦᓚᐅᕐᒥᔪᖓ ᐃᖅᑲᓇᐃᔭᖃᑎᖃᖅᑐᖓ ᐋᓕᒃ ᐃᑎᒪᖕᓇᖅ, ᑰᒑᕐᔪᒻᒥ ᓄᓇᓕᒻᒥ ᐆᒻᒪᖅᑯᑎᓄ ᐊᑦᑎᐊᓛᖑᔪᑦ. ᐋᓕᒃ ᐅᕙᓐᓂᑦ ᖃᐃᖅᑯᔨᓯᒪᔪᖅ ᐃᑲᔪᖅᑎᒋᓗᓂᖓ ᐱᒋᐊᖅᑎᓪᓗᒍ ᓄᓇᓕᒻᒥ ᐱᖃᑕᐅᑎᑦᑎᓂᕐᒥᑦ ᓄᓇᖃᖅᑳᖅᓯᒪᔪᓕᕆᔨᒃᑯᑦ ᑲᓇᑕᒥ ᓄᓇᖃᖅᑳᖅᓯᒪᔪᑦ ᐅᖅᓱᐊᓗᑦᑐᕈᓐᓃᕐᓂᖏᓐᓄᑦ ᐱᓕᕆᐊᖅ (IODI). ᑖᓐᓇ ᐱᖓᓲᓕᖅᑲᖓᔪᖅ ᐱᓕᕆᐊᖅ ᐱᖃᓯᐅᔾᔨᔪᖅ ᓴᓗᒪᔪᓂᑦ ᐆᒻᒪᖅᑯᑎᓂᑦ ᐱᓕᕆᐊᒥ ᐊᐅᓚᑦᑎᓂᕐᒧᑦ ᐃᓕᓐᓂᐊᓂᕐᒥᑦ ᐋᓕᒃᒧᑦ, ᓄᓇᓕᒻᒥ ᐆᒻᒪᖅᑯᑎᓄᑦ ᐸᕐᓇᐅᓂᖅ ᕼᐊᒻᒪᓚᒃᑯᓐᓄᑦ, ᐊᒻᒪ ᐊᑐᓕᖅᑎᑕᐅᓂᖓᓄᑦ ᓄᓇᓕᒻᒧᑦ ᐊᖏᓂᖓ ᓴᓗᒪᔪᓂᑦ ᐆᒻᒪᖅᑯᑎᓂ ᐱᓕᕆᐊᖅ.
ᓄᕙᒡᔪᐊᕐᓇᖅ-19 ᑭᖑᕙᖅᑎᑦᑎᓯᒪᔪᖅ ᐸᕐᓇᐅᑎᓂᑦ ᑕᖅᑭᒐᓚᓐᓂᑦ, ᑭᓯᐊᓂ ᐊᐅᓪᓚᖅᑐᓂ ᐃᓗᐊᓂ ᓄᓇᕗᑦ ᐱᔪᓐᓇᖅᓯᑎᑕᐅᓚᐅᖅᑐᖅ, ᑰᒑᕐᔪᒻᒨᓚᐅᖅᑐᖓ ᓯᕿᓂᕐᒧᑦ ᐆᒻᒪᖅᑯᑎᓄᑦ ᑕᑯᔅᓴᐅᑎᑦᑎᓪᓗᖓ ᐃᑲᔪᖅᑐᒋᑦ ᐃᓄᐃᑦ ᑐᑭᓯᓗᑎ ᖃᓄᐃᑦᑐᑦ ᓄᓇᒦᖔᖅᑐᑦ ᐆᒻᒪᖅᑯᑎᐅᓂᕐᒧᑦ ᓇᓖᕌᕋᔅᓴᓂᑦ ᐱᑕᖃᕐᓂᖏᓐᓄᑦ, ᑐᓴᕐᕕᒋᓪᓗᒋᑦ ᖃᓄᐃᑦᑑᓂᖏᓐᓄᑦ ᐱᓕᕆᐊᓂᑦ ᑕᑯᔪᒪᔭᖏᓐᓂᑦ, ᐊᒻᒪ ᑭᐅᓪᓗᒋᑦ ᐊᐱᖅᑯᑏᑦ.
ᐋᓂᔅ ᐃᖅᑲᓇᐃᔮᖓ ᐃᑲᔪᕐᓂᐊᖅᑐᖅ ᐃᓄᓐᓂᑦ ᑲᑎᑦᑎᓗᓂ ᐅᖃᐅᓯᖃᕐᓗᑎ, ᓄᐊᑕᐅᓗᑎ ᑐᑭᓯᒋᐊᕈᑏᑦ ᐆᒻᒪᖅᑯᑎᓄᑦ ᐊᑐᖅᑕᐅᔪᑦ ᑰᒑᕐᔪᒻᒥᑦᐊᒻᒪ ᐃᓱᒪᒋᔭᐅᔪᑦ ᐱᔪᒪᓂᕆᔭᐅᔪᑦ ᓄᓇᓕᒻᒧᑦ, ᐊᒻᒪ ᑲᑎᖅᓱᐃᓗᓂ ᑐᑭᓯᒋᐊᕈᑎᓂᑦ ᑎᒍᒥᐊᖅᑎᐅᖃᑕᐅᔪᓕᒫᓂᑦ ᐃᑲᔫᑎᐅᓂᐊᖅᑐᑦ ᓴᓗᒪᔪᒥᑦ ᐆᒻᒪᖅᑯᑎᓂᑦ ᖃᓄᐃᓕᓯᒋᐊᓂᕐᒧᑦ ᐸᕐᓇᐅᑦ ᓄᓇᓕᒻᒧᑦ.
ᓯᕿᓂᕐᒧᑦ ᐆᒻᒪᖅᑯᑎᓄᑦ ᐃᓕᓐᓂᐊᑎᑦᑎᓂᖅ ᑰᒑᕐᔪᒻᒥᑦ
ᐊᒥᓱᑦ ᐃᓄᐃᑦ ᑕᑯᔭᖅᑐᓚᐅᖅᑐᑦ ᐅᕙᒍᑦ ᐃᓄᓐᓄᑦ ᑕᑯᔅᓴᐅᑎᑕᖏᓐᓂ ᖃᐅᔨᒋᐊᒃᑲᓂᖅᑐᑎᑦ ᓯᕿᓂᕐᒧᑦ ᐆᒻᒪᖅᑯᑎᓂᑦ. ᐃᓪᓗᕋᓛᖃᖅᑐᑦ ᓇᒻᒥᓂᓖᑦ ᐱᔪᒪᓂᖃᓚᐅᖅᑐᑦ ᐋᖅᑭᔅᓯᓂᕐᒥᑦ ᓯᕿᓂᕐᒧᑦ ᐆᒻᒪᖅᑯᑎᓕᐅᕈᑎᓂᑦ ᐃᓪᓗᕋᓛᖏᓐᓄᑦ ᐅᖅᓱᐊᓗᓐᓂᖅ ᓇᓴᖏᓐᓂᖅᓴᐅᖃᑦᑕᓂᐊᕐᖓᑕ ᓄᓇᒧᑦ ᐅᑭᐅᒃᑯᑦ, ᓯᕿᓂᕐᒧᑦ ᐆᒻᒪᖅᑯᑏᑦ ᐃᓚᒋᓕᖃᕈᓐᓇᖅᑐᑦ ᐊᓄᕆᒧᑦ ᐆᒻᒪᖅᑯᑎᓕᐅᕈᑎᓄᑦ.
ᒥᑭᔫᒐᓗᐊᖅᑎᓪᓗᒋᑦ, ᑕᐃᒪᓐᓇᐃᑦᑐᑦ ᐱᓕᕆᐊᑦ ᐃᑲᔪᖅᑐᑦ ᐃᓄᓐᓂᑦ ᑐᑭᓯᑎᑦᑎᓪᓗᑎ ᐱᑕᖃᕈᓐᓇᖅᑐᓂᑦ ᐊᒻᒪ ᑭᓪᓕᖃᖅᑎᑕᐅᓂᖏᑦ ᓄᓇᒦᖔᖅᑐᓂᑦ ᐆᒻᒪᖅᑯᑎᓂᑦ ᐊᒻᒪ ᐃᑲᔪᕐᓗᒋᑦ ᐃᓱᒪᑎᓐᖑᐊᕐᓗᒋᑦ ᖃᓄᖅ ᐊᖏᓂᖅᓴᒧᑦ ᐊᑐᖅᑕᐅᔪᓐᓇᕐᓂᖏᓐᓄᑦ ᓄᓇᓕᒻᒧᑦ ᐆᒻᒪᖅᑯᑎᖃᖅᑎᑦᑎᓂᕐᒧᑦ.
ᓱᒻᒪᑦ ᓄᓇᓕᐅᔪᖅ ᓱᖁᑎᔅᓴᖅᑲ
2018−ᒥ, ᐳᓚᕋᖅᑎᓄᑦ ᐅᒥᐊᕐᔪᐊᖅ ᐃᒃᑲᕿᓚᐅᖅᑐᖅ ᖃᓂᒋᔭᖓᓂ ᑰᒑᕐᔪᒃ, ᑯᕕᑎᑦᑎᓪᓗᓂ ᐅᖅᓱᐊᓗᒻᒥ ᐊᕙᑎᒧᑦ . ᑯᕕᔭᐅᔪᖅ ᑭᓪᓕᖃᓚᐅᖅᑑᒐᓗᐊᖅ, ᑐᐹᖅᓯᓚᐅᖅᑐᖅ ᓄᓇᓕᐅᔪᒥᑦ ᐱᒻᒪᕆᐅᔪᓂᑦ ᐊᕙᑎᒧᑦ ᐊᑦᑕᓇᕈᑎᐅᔪᓂᑦ ᑐᓐᖓᕕᖃᓂᕐᒧᑦ ᐅᖅᓱᐊᓗᐃᑦ ᐅᒥᐊᕐᔪᐊᑰᖅᑎᑕᐅᓂᖏᓐᓄᑦ ᓄᓇᓕᒻᒧᑦ.
ᓄᓇᓕᐅᔪᖅ ᑰᒑᕐᔪᒃ ᓱᑲᑦᑐᒥᑦ ᐱᕈᖅᐸᓪᓕᐊᔪᖅ. ᑯᐊᐸᒃᑯᑦ ᓂᕿᑖᕐᕕᖓ ᓂᐅᕕᕐᕕᒃ ᐊᖏᓪᓕᒋᐊᖅᑕᐅᓕᖅᑐᖅ, ᐸᕐᓇᐅᑎᑕᖃᖅᑐᖅ ᓂᐅᕕᕐᕕᒻᒧ, ᐊᒻᒪ ᓄᑖᓂ ᐃᓪᓗᓂᑦ ᓴᓇᔭᐅᕙᓪᓕᐊᔪᑦ.
ᐱᒋᐊᕐᓂᖏᓐᓂ ᐅᑦᑑᐱᕆ, ᑰᒑᕐᔪᒃ ᓯᕿᓂᕐᒧᑦ ᐆᒻᒪᖅᑯᑎᓕᐅᕈᑏᑦ ᐃᓚᒋᓕᖅᑎᑕᐅᓚᐅᖅᑐᑦ ᐆᒻᒪᖅᑯᑎᓄᑦ ᐊᒻᒪ ᐆᒻᒪᖅᑯᑎᖃᕈᓐᓇᑎᑦᑎᓂᐊᖅᑐᖅ ᓄᓇᓕᒻᒧᑦ ᖁᐊᒃᑯᕕᒻᒧᑦ. ᐃᖃᓗᑦᑑᑦᑎᐊᖅ, ᑭᓯᐊᓂᓕ, ᓱᓕ ᐅᑕᖅᑭᔪᑦ.
ᒪᒃᑯᑦᑐᑎᑦ, ᐱᕈᖅᐸᓪᓕᐊᔪᑦ ᐃᓄᒋᐊᓐᓂᖏᓐᓂᑦ ᐊᒻᒪ ᓄᑖᑦ ᐱᖁᑎᕐᔪᐊᑦ ᐸᕐᓇᑕᐅᔪᑦ ᓄᓇᓕᒻᒧᑦ, ᐱᒻᒪᕆᐅᔪᖅ ᑖᒃᑯᐊ ᓄᑖᑦ ᐆᒻᒪᖅᑯᑎᓄᑦ ᐱᔭᐅᔪᒪᔪᑦ ᑎᑭᑕᐅᓗᑎ ᓴᓗᒪᓛᓂᑦ, ᓯᓚᒧᑦ ᐱᐅᓛᓂ ᐆᒻᒪᖅᑯᑎᓂᑦ ᐊᑐᖅᑕᐅᔪᓂᑦ ᐊᑦᑕᓇᐃᖅᓯᒍᓐᓇᖅᑐᑦ ᓄᓇᒦᖔᖅᑐᓂᑦ ᑭᖑᕚᕆᓂᐊᖅᑕᑎᓐᓄᑦ.